K’cimi i Tropojës është një vallëzim festiv që praktikohet gjatë gjithë vitit, dhe veçanërisht gjatë ceremonive festive tradicionale, të tilla si dasma, fejesa, ditëlindje, ceremoni inicimi, festa fshati dhe raste të tjera shoqërore, përfshirë ato që janë më pak zyrtare, dhe shpesh mjaft spontane.  Vallja e Tropojës mund të interpretohet nga të rinjtë në ngjarje shoqërore private më të vogla dhe tubime shoqërore të relaksuara. K’cimi i Tropojës ka qenë një pjesë thelbësore e vallëzimeve të dasmës. Përveç vallëzimeve ku K’cimi kryhet i përzier, nga burra dhe gra, vajza dhe djem, ekziston edhe një shumëllojshmëri e valleve martesore gjinore rituale ku interpretohet K’cimi, të tilla si, vallja e grave të moshuara, vallja e nuseve të reja të farefisit, vallja e vajzave dhe vallja e burrave. Vallja e nuseve të reja është vallëzimi i vetëm ku K’cimi interpretohet individualisht, ku nuset e reja, ndoshta nga rajone të tjera, tregojnë se sa mirë kanë arritur të mësojnë vallëzimin e K’cimit. Sidoqoftë, vallëzimi kryhet nga disa çifte njëkohësisht, shpesh përfshin një burrë dhe një grua, por jo domosdoshmërisht, me ndërrimin e partnerëve sipas rastit dhe zgjedhjes së valltarëve. Performanca bashkëkohore gjithnjë e më shumë përfshin burra, gra dhe fëmijë. Ritmi i tij është i shpejtë dhe i gëzueshëm. Njerëzit nuk e prekin njëri-tjetrin gjatë kërcimit, por e kryejnë atë ballë për ballë. Lëvizjet janë vertikale, dhe kërcimtarët shpesh bëjnë kërcim-hedhje me një farë lartësie nga toka, duke i ngritur krahët lart dhe duke i shtrirë ata anash, ndërsa  lëvizin rreth njëri-tjetrit në një hapësirë të kufizuar, duke mbajtur pozicionin ballë për ballë. Ndërsa në disa raste, vallëzimi lejon improvizim dhe shprehi sipas ndjenjave të valltarit. Më shumë kuptimet tradicionale të K’cimit lidhen me festimet e pranverës. Me kalimin e kohës, kuptimi shoqëror i vallëzimit është përshtatur me ndryshimin e zakoneve dhe përfshin shprehje miqësie. Të rinjtë përdorin mundësinë e dhënë nga K’cimi, për t’u njohur me njëri-tjetrin. K’cimi luhet me tupan, çifteli dhe fyell. Pjesëtarët e komunitetit që praktikojnë K’cimin vazhdojnë në disa raste të veshin kostume tradicionale ceremoniale, megjithëse jo vetëm ato. Gjatë ceremonive më solemne, të tilla si dasma, familjet në Tropojë, ose me origjinë nga Tropoja, por që jetojnë diku tjetër, kanë tendencë të veshin kostume tradicionale kur kërcejnë K’cimin. Gratë mund të përdorin gjithashtu një shami të veçantë tradicionale, me ngjyrë të kuqe ose të verdhë, por kjo nuk është domosdoshmëri.