Gatimi i tavës së krapit është trashëguar brez pas brezi nga gratë e familjeve të zonës, pasi ka qënë ushqim i shpeshtë në familjet shkodrane për shkak të afërsisë me liqenin ku kapet krapi, i cili është përbërësi kryesor i këtij gatimi tradicional. Në ditët e sotme ajo gatuhet nga gjithë restorantet pranë Liqenit të Shkodrës, por ruhet dhe në traditën e gatimit familjar.

Përgatitja e tavës së krapit.

Fillimisht pastrohet krapi, nga luspat dhe hiqen veshët dhe të brendshmet, lahet me ujë të bollshëm dhe ndahet në kurma. Marinohet me kripë, ku lihet rreth 3 orë. Gjatë kësaj kohe përgatitet içi.

Përgatitja e içit

 Për një krap 3-4 kg duhet 1 kg qepë, e cila pastrohet, grihet imët dhe bëhet gati për skuqje. Kësaj mase i shtohet dhe 300 gr, hudhra të grira. Bëhet një skuqje e lehtë krapit, sa të marre faqe, dhe futet paraprakisht në furrë. Në vajin e mbetur hidhen qepët dhe hudhrat e grira, masa skuqet lehtë dhe i shtohet 200 gr. salcë domatesh, pak kripë, pak uthull, piper i bluar, spec djegës, një lugë kafeje sheqer, 5-6 kumbulla të thara, si dhe pak pistil.

Lëngu ose sic quhet içi, lihet për rreth 30 minuta në tigan, më pas i hidhet sipër peshkut në tavë dhe futet në furrë për t’u pjekur, ku lihet rreth 90 -120 minuta. Gjatë pjekjes shumica e lëngut avullon dhe içi merr një shije të vecantë.Pasi nxirret tava nga furra, serviret në tryezë.  Gatimi i krapit në tavë ka dy mënyra, që janë të përafërta: ajo e Shkodrës dhe ajo e Malësisë së Madhe. Në Malësi tavës i hidhet dhe limon, gjethe dafine, më tepër ujë, por nuk i hidhet piper dhe spec djegës.